Letras (MMXVI/Weltenasche) - Karg

(MMXVI/Weltenasche)

Du sogst für mi woa des Leben nia mehr ois a schlechter Scherz
A ausg‘arteter Schmäh, der oam weder Spaß mocht no betriabt
I hobs scho immer recht witzig gfunden, obwoi des ois einglich zum rean is
Wost oba recht g’hobt host, I siag im Leben echt ned recht vü mehr ois des…
I glab I hob nia in oi de Joa, wen mehr g’liebt ois wie di
Und so mei Jugend vaspüt, wei I imma nur auf di g‘setzt hob
I hob de foische Woi troffn, so wie desmoi woi a
Oba des spüt jetz koa Roin mehr, I woit den Weg scho domois geh…
Kriachts ruhig weida am Bodn umma und suachts no noch am Funkn Glück
Füa mi hod sie de G’schicht erledigt, für mi is des jetz gwen…
Wia I scho gsogt hob, bis doher, owa koan Schritt weida
Werd I mit dera Last no geh, de mi zu eich owidruckt am Bodn…
Leida hod mi oi der Wein, no imma ned obg‘stumpft
Und a wenn nu a boa Summa vagehn, oans wiad si nid ändern:
I ko mi doch dem gonzn nid entziang, a wonn I’s mechat
Oba wei I woas wies lafft, loss I mi dawei no ned gonz untakriang
De Wöd is nix ois wia a Totenacker, du woast as jo a…
Ihr mochts mi olle so kronk, I ko goaned sovü saufen, wia I wieder hispeim wü…
Oba oans sog i da a, I werd no sowos vo obrechna
Ihr werds eicha Wöd danoch niemois nimmer wieder erkenna…
Da Boch unt im Woid, soi vuaerst mei nosses Grob sei
Bis mi findn und durt vascharren wo sovü vo uns scho lieng
Zerst werds mi vamissen, donn eich nur mehr grob erinnern
Wer I in eicham Leben woa und wöcha Roin I moi gspüt hob
Und ihr werds as eh seng, scho noch a poa Joa werds nimma oft an mi denken
Nimma oft an mei Grob kem und eichre Leben einfoch weidalebn
Werds seng, de Wöd sie hod sie weida draht, mit oda ohne mir
Und es werd iangwon wer ondara kumma der mein Plotz einimmt…
I nimm nur no an letzten Schluck, a letztes Glasl im steh…
Die Zeit vageht so leise, und wia homs wieda üwaseng…
De Wöd steht nimma long, wia hättens niemois gmoant
Wia hom imma nur drauf gwoat und long so do, ois gangats nur um uns alloa…
Lebts woi!